25.2.16

Litað í snjóinn

 

Um daginn dreif ég loksins í að framkvæma skemmtilega hugmynd sem ég hafði einhvern
tímann séð á flakki mínu um veraldarvefinn.
 
 
Við blönduðum vatni og matarlit í úðabrúsa og úðuðum svo í snjóinn af hjartans lyst!
 
 
Þessi skemmtun hentar ungum sem öldnum. Þessi gormur lét ekki sitt eftir liggja og auðvitað fór smá matarlitur á andlitið og fötin en það kom ekki að sök.
 
 
Það voru gerðar ýmsar tilraunir, reynt að blanda litunum saman, sprautað stutt og langt
og jafnvel upp í loftið!
 
 
Mömmurnar sem voru með guttunum skemmtu sér ekki síður vel við að lita snjóinn,
svona á milli þess sem þær þurftu að forða sér undan úðanum!
 
Mæli með þessu!

21.2.16

Skrímslin í Gerðubergi

 
Ég dreif mig loksins með guttann á sýningu Skrímslin bjóða heim í Gerðubergi sem er ætluð fyrir 2-8 ára börn. Ég er mikill aðdáandi Skrímslabókanna sem eru mannlegar, fyndnar, krúttlegar, fallegar og já, bara dásamlegar.
 
 
Fyrst er auðvitað að fara úr skónum.....
 
 
og svo er bara að prófa og gera allt það skemmtilega sem er í boði!
 
 
Sýningin er einstaklega litrík og skemmtileg og allt í henni er tilvísun í einhverja af skrímslabókunum

 
Það er hægt að klifra upp í tré

 
jább, líka dúkkur komast upp í tré með smá hjálp!
 
 
og ef vel er að gáð má finna skrímslakisa einhvers staðar.
 
 
Draugahúsið vakti mikla lukku
 
 
Mikið skemmtum við okkur vel á þessari sýningu um skrímslin þar sem svo margt skemmtilegt er hægt að gera. Myndirnar hér að ofan sýna aðeins hluta af því sem hægt er að gera svo ekki sé minnst á að gaman er að setjast niður og glugga í bækurnar (meira að segja á mörgum tungumálum!)
 
Það kostar ekkert á sýninguna og hún stendur til 24. apríl 2016.
 
Við kíktum svo á bókasafnið og fengum skrímslabók og aðrar bækur með lánaðar heim. Mamman skoðaði af áhuga skrímslavörurnar sem hægt er að fá í safnbúðinni enda eru myndirnar hennar Áslaugar Jónsdóttur alveg dásamlegar. Gaman að setja svona kort í ramma upp á vegg eða kaupa veggspjald fyrir barnaherbergið.
 
 
Upplýsingar um sýninguna, opnunartíma og skemmtilega viðburði um helgar hér.
 

9.2.16

Persónulegt dagatal


Ég hef undanfarin ár gert dagatöl í jólagjafir og gefið ömmum&öfum og fleiri ættingjum myndir af guttanum. Skemmst er frá því að segja að þetta slær í gegn á hverju ári.
 
Auðvitað hefur guttinn líka fengið dagatal. Fyrst fannst honum svo gaman að skoða myndirnar aftur og aftur og spjalla um þær. Núna er dagatalið notað til að merkja inn atburði og afmæli og ræða um daga og mánuði. 
 
Það tekur dágóðan tíma að fara í gegnum myndir ársins, velja þær bestu og fínpússa svo að dagatalið gleðji líka augað en mikið er það skemmtilegt. Gott verkefni þegar árið líður á enda að renna yfir árið og allt það skemmtilega sem maður gerði með fólkinu sínu og fyllast þakklæti. Og rifja upp allt það sem maður kom í verk (sem er ágætis tilbreyting frá listanum langa í höfðinu um allt það sem maður kom ekki í verk!).
 
Það hafa allir jafn gaman af dagatalinu góða.
 
 
Venjulega hef ég gert sömu útgáfuna fyrir alla þar sem það er ódýrara þegar maður kaupir dagatalið hjá prentþjónustu. Og tekur minni tíma.
 
Í ár ákvað ég að vera sérstaklega dugleg og gera margar mismunandi útgáfur allt góða fólkið mitt, sem skýrir afhverju þessi færsla kemur inn í febrúar (og ekki eru öll tilbúin enn!).
Þetta er mikil vinna en mjög skemmtileg.
 
 
Hérna sjáið þið glefsur úr dagatalinu sem ég gerði fyrir aldraða frænku mína.
Hún hafði mikið gaman af því að sjá þessar gömlu myndir og tengdi betur við þær heldur en nýju myndirnar í dagatalinu.
Við gátum líka spjallað aðeins um þær, það er hjálplegt þegar það er orðið erfitt að finna umræðuefni. Ég hafði ekki minna gaman af því að skoða þessar gömu myndir og vinna með þær.
 
Myndin hérna fyrir ofan finnst mér svo falleg, öll svo ung og falleg í sól og sumaryl í Köben.
Ég veit ekki hver tók þessa mynd því hann afi minn, Sveinbjörn Þórhallsson, er á henni en aðrar myndir tók hann. Eins og þessar flottu myndir úr Heklugosi árið 1947.
 

 
 Glöggir lesendur hafa sennilega tekið eftir að dagatalið er á ensku, en ég fann bara fríkeypis dagatal þar sem maður gat bætt við mynd á veraldarvefnum. Sparaði mér smá vinnu þar.
 
 
Best að drífa sig í að ljúka við síðustu dagatölin - það er ekkert sem segir að dagatal megi ekki vera frá mars 2016 til febrúar 2017, er það nokkuð!?!