19.11.16

Fleiri stafróf fyrir litla svampa

Ein af vinsælli færslum hér á blogginu er um íslensk stafrófsplaköt sem henta vel fyrir barnaherbergin.
Það er mikil gróska í þessu og mig langaði til að segja ykkur frá fleirum sem ég hef rekist á í netheimum.


vegglímmiðar í nokkrum litum
gaman að það eru bæði há-og lágstafir og "rétt" a og g

eru einstök listaverk sem sóma sér jafnvel bæði í barnaherberginu og stofunni
plakatið fæst t.d. í Upplifun í Hörpunni og Sveitabúðinni Sóley
einnig er hægt að kaupa plakatið og staka stafi hjá listakonunni
frábær gjafahugmynd fyrir unga sem aldna blóma unnendur




stafrófspönduna frá Ernulandi kannast margir við enda einstaklega falleg
bæði há- og lágstafir og fæst líka með enska stafrófinu


einföld og falleg og fást í nokkrum útgáfum


eru með þessar tvær gerðir
aðra litríka og hina svart/hvíta með ofurhetjum

ég má einnig til með að benda ykkur á þetta stafaspil sem að Eyrún vinkona teiknar
hægt að kaupa hér

Fleiri plaköt og hugmyndir hérna

myndir eru allar fengnar af síðum fyrirtækjanna
þessi færsla er ekki kostuð eða styrkt á nokkurn hátt


16.10.16

Klósettrúllukastalinn


Í dag minnti Facebook mig á að fyrir ári síðan varð þessi klósettrúllukastali til.
Guttinn var lasinn og þetta samvinnuverkefni okkar tók nokkra daga.
Fínasta tilbreyting þegar litlir gormar eru lasnir heima, stutta stund í einu.

Ég er með alls konar krakkaföndurshugmyndir á Pinterest og í þetta sinnið valdi guttinn að gera svona kastala.


Þá kom sér vel að guttinn safnar klósettrúllum af mikilli samviskusemi.
Hinir kassarnir fundust inni eldhússkáp.
Við hjálpuðumst að við klippa klósettrúllurnar en uppröðunin er eftir hans höfði.


Þetta verkefni tók nokkra daga og ég hjálpaði honum svolítið við þetta föndur,
enda úthaldið ekki alltaf mikið þegar maður er lasinn.
Við notuðum alls konar liti af málningu, gimsteina og glimmermálningu.
Guttinn var alveg með á hreinu hvernig kastaladyr eru og klippti þær út sjálfur en fannst þó fráleitt að hafa þær í miðjunni...!


Mamman fékk leyfi til að setja þessar litlu leynidyr á kastalann fyrir kisuna.


Eins og á öllum alvöru kastölum er skrautlegum fánum flaggað.


Það varð meira að segja til lítil saga um kastalann:
Prinsinn og hann átti vonda kisu og líka vonda drottning.
Hún átti heima niðri og hann átti heima efst uppi.
Stundum var hún svo vond að hún þurfti að fara eitthvað annað.
Þegar hún var hætt að vera vond flutti hún aftur heim.

Kastalinn þolir ekki mikið hnjask og við höfum nokkrum sinnum þurft að líma turna aftur á.
Guttinn er enn afar stoltur af þessum litríka og glimmer skreytta kastala ári seinna. 
Það varð meira að segja að flytja hann með viðhöfn þegar við fluttum í vor,
enda konungleg hýbýli.


Hér má sjá hvernig við gerðum lest úr klósettrúllum.

11.8.16

Kleinujárn



Einn ljúfan sumardag dundaði ég við að taka myndir af kleinujárnunum
Hann býr líka til laufabrauðsjárn, þið getið séð meira um þau hér.


Hérna er uppskriftabókin hennar mömmu í bakgrunni. Hún fletti einmitt upp í henni til að finna góða kleinu uppskrift....ég hefði leitið á netinu!


Það var af nógu af taka þegar ég leitaði að fallegum gömlum munum til að nota í uppstillingar


Sú gula ljómaði og því ekkert til fyrirstöðu að taka líka myndir úti



Ég hafði meira að segja fyrir því að fara út með sparibolla og hella upp á kaffi til að hafa í bollanum, enda er náttúran fallegasti bakgrunnurinn.



Á þessari mynd sjáið þið kleinujárnið í góðum félagsskap laufabrauðsjárnanna


19.7.16

Sumarið inn í stofu


Nokkar myndir af yndisfögrum sumarblómum sem ætti að vera á flestra færi að nálgast


Gaman að leggja á borð með þessu borðskrauti

Þetta fallega og skemmtilega flækjublóm tekur sig vel út í vasa
 (það heitir víst Umfeðmingur, sem er réttnefni, það "krækir" sig fast við aðrar plöntur sem það vex hliðin á)


Svo má ekki gleyma að leyfa börnunum að leggja sitt af mörkum og raða alveg sjálf í vasa


Þá er bara að skella sér út og finna falleg blóm, hvort sem maður nýtur þeirra í náttúrunni eða tekur með sér heim og setur í fallegan vasa.

24.4.16

Rósir og rjómi 4 ára


Í tilefni af 4 ára afmæli bloggsíðunnar gaf ég mér tíma til að dunda við nýjan "haus" fyrir síðuna.
 Sá gamli var búinn að þjóna hlutverki sínu afar vel undanfarin ár en ég vona þó að þessi nýi verði ekki næstu fjögur ár, þó ég sé nokkuð sátt við hann :-)

Fyrir áhugasama þá vann ég þetta í PicMonkey myndvinnsluforritinu. Ég er að fikra mig áfram með það þegar ég hef tíma og nennu.


Ljúfar vorkveðjur til ykkar ágætu lesendur!

29.3.16

Star Wars afmæli


Enn og aftur er Star Wars vinsælt og því líklegt til þess að vera á óskalistanum hjá mörgum fyrir afmælisþema. Þessar myndir eru úr fertugsafmæli þar sem afmælisbarninu var komið á óvart með veislu. Og jú, það er fullt af fertugum afmælisbörnum sem elska að fá Star Wars afmæli!


Auðvitað urðu að vera geislasverð. Þó að ég viti ekki mikið um Star Wars veit ég að geislasverðin verða að vera! Þetta eru einlitar servíettur og "free printables" eða fríkeypis til útprentunar héðan sem eru einfaldlega límd utan um upprúllaða servíettuna.


Ég var reyndar að flýta mér svo mikið þegar ég gerði þetta að sverðin voru óþarflega stutt hjá mér, sem kom berlega í ljós þegar farið var að nota sverðin.....


þetta var þó auðvelt að laga með því að rúlla servíettunum öðruvísi upp!

Allir lögðu til veitingar á hlaðborð og við höfðum í huga uppáhalds nammi afmælisbarnsins í gegnum árin.....


 Þessi fínu "skilti" til útprentunar keypti ég á Etsy á þrjá dollara og gat sett þann texta sem ég vildi


Ég verð að viðurkenna að ég er ekki sleip í Stjörnustríðsísku og þurfti því að fletta upp á veraldarvefnum til að fá innblástur að sumum nöfnunum....


...þannig að sumt hljómar kannski ekki gáfulega fyrir þá sem eru vel að sér í þessum fræðum.


Aðrar hugmyndir gat ég bara fengið lánaðar, enda ljómandi fínar!


Ég nota gjarnan efni sem fríkeypis til útprentunar (e. free printables) og þetta er frábært dæmi um slíkt; yoda soda og vaderade. Einfaldlega prenta út og líma utan um gosdósir, tær snilld!



Það var auðvitað myndband með krúttlegum og pínlegum myndum af afmælisbarninu eins og venjan er og þar komu frasarnir úr  Star Wars bíómyndunum sér vel.

Afmælisbarnið er sjálft duglegt í frasa smíðinni og við rifjuðum þá helstu upp og hengdum upp á vegg:



Ég fann þetta ókeypis letur á vefnum (e. free fonts) og setti svo bara upp í Word ritvinnsluforritinu.
Letrið sem minnir á Star Wars má finna hér og Star Trek hér.


Það er hægt að leika sé með svona letur á margan hátt, t.d. í myndbandi eða myndasýningu fyrir afmælisbarnið, í boðskortum.....

Þá er ég búin að sýna ykkur þær hugmyndir sem ég notaði í þetta sinn, það er auðvelt að finna hafsjó hugmynda á netinu og aðlaga að afmælisbarni og aðstæðum, ég pinnaði t.d. nokkrar hér.

Megi mátturinn vera með ykkur!


7.3.16

Ferming 2016 - hugmyndir að veisluskreytingum


Mér bauðst aftur að föndra smá í samvinnu við A4 en í þetta skiptið var þemað ferming.

Hérna sést gestabókin en forsíðan er teiknuð fríhendis með Posca pennum og ég kaus að handskrifa á hana. Ef að ég ætti fermingarbarn hefði ég sennilega reynt að sannfæra það um að gera forsíðuna, enda væri það skemmtileg og persónuleg minning seinna meir.
Í bókinni eru margar blaðsíður þannig að hægt væri að líma inn myndir tengdar fermingunni.
Einnig væri afar skemmtilegt ef að gestirnir skrifuðu eða teiknuðu persónulega kveðju til fermingarbarnsins.


Svona sá ég gestabókina og hugsanlegt pakkaborð fyrir mér.
Hillurnar er í samræmi við geometrískt þemað og gaman að leika sér með
liti, hæð og dýpt þegar maður notar þær á borð.
Ég málaði hillurnar í samræmi við litaþemað með akrýlmálningu.


Ég notaði Posca pennana einnig til að teikna á steininn og hafði sama mynstur og á gestabókinni.
Ég get frætt ykkur á því að það er mun erfiðara að teikna svona á rúnnaðan og óreglulegan stein en á slétt blað!


Þetta er svo hugmynd fyrir veisluborðið,
en það voru mjög fábrotnar veitingar í þessari sýndar- fermingarveislu, haha!

Mér fannst mynstrið á servíettunum svo flott og fannst sniðugt að búa til þverslaufur úr þeim.
Slaufuservíetturnar þjóna bæði hlutverki skrauts og munnþurrku.
Ég notaði mynsturlímband til að líma þverslaufurnar.


Hérna sést betur hvernig þverslaufan er fest við hnífapörin,
sem getur verið handhægt þegar boðið er upp á hlaðborð.
Ég reyni að forðast einnota plast borðbúnað og varð því að prófa þessi einnota hnífapör úr birki. 
Mér er óhætt að mæla með þeim maður kemst ekki hjá því að nota einnota.


Fábrotnar veitingarnar runnu ljúflega ofan í ljósmyndarann og litla aðstoðarmanninn eins og sjá má.
Þar með lýkur þessari litlu þykjustu fermingarveislu og eins og í öllum góðum veislum fara allir heim búnir að fylla á líkamlega og sálræna tankinn.


Eftirtaldar vörur fékk ég að gjöf frá A4: Panduro Hexagon Boxes,
house doctor servíettur og gulan Posca penna.